எழுதுதல் திறன் மேம்பாட்டில் – ”கணினிவழிக் குறைதீர் கற்றல் கருவி”- ச. ஜாஸ்லின் பிரிசில்டா, (ஆய்வாளர்)

முன்னுரை:

ஒரு மொழியைக் கற்கும் பொழுது கற்போர் பல்வேறு காரணங்களால் பிழைசெய்வது இயற்கை. மாணவர்களின் பிழைகளை இனங்கண்டு அதனைக்களையச் செய்து மொழியினை முறையாகப்பயன்படுத்த கற்றுக்கொடுக்கவேண்டும். மாணவர்களின் பிழைகளைச்சுட்டிக் காட்டுவதாலோ அவர்களின் பிழைக்குப் பதில் சரியான மொழியமைப்பில் எழுதச்செய்த்தாலோ பிழைகள் முற்றிலும் நீக்கப்படுவதில்லை. மாறாகப் பிழைகளைத்தொகுத்து காரணம் கண்டறிந்து துல்லியமாகப் பிழை நீக்க உதவுவதே பிழை ஆய்வு ஆகும்.

மொழிக்கல்வி என்பது பேசுதல் எழுதுதல் வாசித்தல் கேட்டல் ஆகிய நான்கு திறன்சார் கற்றல் ஆகும். அதில் எழுதுதல் திறனில் சிறப்புப்பெற இலக்கணப் பிழையற்ற எழுதுதல் இன்றியமையாதது. பள்ளிக்கல்வி முழுமையிலும் இலக்கணக் கூறுகள் கற்றிருந்தும் கல்லூரிக்கல்வியிலும் இலக்கணப் பிழைகள் நேரும்பொழுது எழுதுதல்த் திறனைக் குறைக்கின்றது. ஆகவே, தவறுகள் நிகழும் கூறுகளில் மட்டும் குறைதீர் கற்றல் வழி பயின்றுகொண்டால் எளிதில் இலக்கணப்பிழைகளைக் களையலாம். அதனையும் கணினிவழிக்  கல்வி ஏற்பாட்டில் தாமே கற்றல் அடிப்படையில் கற்பதற்குத் தேவையான குறைதீர் பயிற்சிக் கருவி வடிவமைத்தல் இன்றையத்தேவையாகும்.

தமிழ் மொழிப்பாடப் பிழைகள் :

மொழியின் இயல்பான நிலைக்கு மாறாகப் பேசும்போதும் எழுதும்போதும் ஏற்படும் தவறினை பிழை என்று குறிப்பிடலாம். எழுதும் பொழுது ஏற்படும் பிழைகளை எழுத்துப்பிழை, சந்திப்பிழை ,மரபுப்பிழை ,திணை-பால்-எண் -இடப் பிழை தொடரமைப்புப் பிழை,கருத்துப்பிழை, பொருள்பிழை எனப் பகுக்கலாம்.. இதனை மொழியியல் அடிப்படையில் முறையே ஒலியியல்,உருபனியல்,தொடரியல் ,பொருளியல் ஆகிய நிலைகளில் ஏற்படும் பிழைகள் எனக் கூறலாம். மரபிலக்கண அடிப்படையில் எழுத்துநிலை, சொல்நிலை ,பொருள்நிலைப் பிழைகள் எனப் பகுக்கலாம். மேலும் , கல்வியில் பிழை ஆய்வு அடிப்படையில், மாணவர்கள் தமிழ் மொழி கற்கும் பொழுது செய்யும் பிழைகளாகப் பின்வரும் ஏழினைக் கூறலாம்:

ஒப்புமையாக்கம், விதிவிலக்கு அறியாமை, தவறான கருத்துருவாக்கம்

எளிமையாக்கல், தூண்டுதல், பேச்சுவழக்கின் தாக்கம், பயிலாமை.

பிழைகளே செய்யாமல் மாணவர்கள் கற்றுக்கொள்ள இயலாது. மாணவர்கள் ஒவ்வொரு பிழை செய்யும் பொழுதும் கற்றுக்கொள்கிறார்கள். பிழைகளைக் களைந்து சரியாகக் கற்கும் பொழுது கற்றலில் முன்னேறுகிறார்கள். பிழைகள் மாணவர்களின் கற்றலில் நேர்ந்த குறை என்பதால் ஆசிரியர்கள் பிழைகளுக்கான காரணத்தைக்கண்டுபிடித்து களையா விட்டால் மனதில் ஆழப்பதிந்து கல்மேலெழுத்துப் பிழை என மாற வாய்ப்புள்ளது.

பிழைகளை இனம் காணல் :

எந்த ஒரு துறையிலும் கோப்புகளைப் பாராமரித்தல், ஊடகங்களுக்கு எழுதுதல், படைப்பிலக்கியம், வணிகக்கடிதங்கள் என்று எல்லா மொழிவழி இயக்கத்திற்கும் எழுதுதல்திறன் மிகவும் முதன்மையானது. ஆகவே மாணவர்களின் எழுதுதல்திறனில் இலக்கணத்திறனை மேம்படுத்துதல் வேண்டி அவர்களின் இலக்கணக் குறைகளைக் களையும் பொருட்டு கணினிவழிக் குறைதீர் பயிற்சிக் கருவி உருவாக்குதலான இவ்வாய்வில் மதுரைக் காமராசர் பல்கலைக்கழக அங்கிகாரம் பெற்ற மேரிமாதா கல்லூரி, நல்லகருப்பன்பட்டி, பெரியகுளம் வட்டம், தேனி மாவட்டத்தில் இளங்கலை முதலாமாண்டு இரண்டாமாண்டு பொதுத் தமிழ் பயிலும் மாணவர்களின் மாதிரித் தேர்வுத்தாளில் காணப்படும் பொதுவான கீழ்க்கண்ட இலக்கணப் பிழைகள் ஆய்வாளரால் தேர்வுத்தாள் வழி ஆய்வு செய்து கண்டறியப்பட்டுள்ளது.

1. ஒரே மாதிரியான உச்சரிப்பு ஒலியினைப் பெற்று வேறு வரிவடிவத்தினை கொண்டுள்ள எழுத்துக்களை எழுதுவதில் ஏற்படும் பிழைகள்.

"இந்த அண்புடமை மிகவும் மனிதனுக்கு இருக்க வேண்டிய ஒன்றாகும்."கேள்வி எண் 17, திருமந்திரம்-அன்புடைமை ,தேர்வு எண் : B1120256, துறை: IT( 2nd Year).

2. ஒற்று மிகும் மிகா விதி அறியாமையால் ஏற்படும் பிழைகள்.

"....இவர் காமராசர் பல்கழைகலகத்தில் தமிழ் துறை தலைவராக விளங்கியவர்........"கேள்வி எண் :15, புதுக்கவிதையின் தோற்றமும் வளர்ச்சியும் , தேர்வு எண் : 12MMC2525, துறை: BCA(First Year)

3. மரபு அறிவின்மையால் ஏற்படும் பிழைகள்.

4. திணை-பால்-எண் -இட வழுக்கலால் உண்டாகும் பிழைகள் .

"சீதை கோபத்துடன் வேண்டாம் நீங்கலே பிடித்து வாருங்கள் என்றான்."- கேள்வி எண் 13. 'தெய்வம் நீ என்று உணர் '(நாடகம் ),தேர்வு எண் :12MMC3206, துறை: B.comE.com(First Year)

5. தொடரமைப்பில் உண்டாகும் பிழைகள்

6. கருத்துத் தெரிவின்மையால் உண்டாகும் பிழைகள் .

சரியாகக் கற்காமையால் மழைக்குறி வெள்ளம் என்பதை திருக்குற்றாலக் குறவஞ்சியின் மலை வளத்தோடு கலந்து தவறாக எழுதப்பட்ட விடை."மலைக்குறி வெள்ளம் என்ற தலைப்பில் சிற்றிலக்கியங்களில் ஒன்றாக இது திகழ்ந்து வந்துள்ளன."கேள்வி எண் :18, முக்கூடற்பள்ளு , தேர்வு எண் :B1119985,துறை: B.Sc.CS(2ndYear)

7. பொருள் வழுக்கலால் உண்டாகும் பிழைகள்.

இதனை மேலும் இரண்டாகப் பகுத்துக் காணலாம்.

1. மரபிலக்கண தேர்ச்சி இன்மையால் ஏற்படும் பிழைகள்.

2. பாடப்பொருள் பயிலாமையால் உண்டாகும் பிழைகள்.

குறைதீர் கற்றல் கருவி :

மாணவர்கள் ஏற்படுத்தும் பிழைகள் என்பவை கற்றலில் உள்ள தடைகள். பிழைகளுக்கு ஏற்ப குறைத்துக் கொண்டு மதிப்பெண் வழங்குதல் என்பது கற்றலை முழுமைப்படுத்த உதவாது. ஆகவே , மாணவர்களிடம் பிழை ஆய்வு செய்தவுடன் அதனை களைவதற்குத் தேவையான குறைதீர்க் கற்றல் கருவியை உருவாக்கி மாணவர்களைக் கற்கச் செய்து முழுமையாகப் பிழைகள்நீக்கிக் கற்றலில் மேம்பாடு அடையச் செய்ய வேண்டும். கற்றலில் முழுமைத்தன்மை ஏற்பட மரபு முறை கற்றலைவிட நுட்பவழி அல்லது கணினிவழிக் கற்றலே மிகுந்த பயனுடையது.

மாணவர்களின் தேர்வுத்தாளில் சந்திப்பிழைகளின் விகிதம் பொதுவாகவே அதிகமாகவும் அனைவர் தாட்களிலும் காணப்பட்ட சூழலில் ஆய்வாளர் கணினிவழிக் குறைதீர் கற்றல் கருவிக்கு சந்திவிதிகள் பகுதியினைப் பாடப்பொருளாக எடுத்துக் கொண்டு தாமே கற்றல் அடிப்படையில் கற்றல் பாட மாதிரியை உருவாக்கி இருக்கிறார். இது html மற்றும் visual basic கணினி நிரல் மொழிகளில் உருவாக்கப்பட்டது. இது இந்த ஆய்வுத் தாளுக்காக மிகக் குறுகிய கால அளவில் தயாரிக்கப்பட்டது. இந்த குறைதீர் கற்றல் கருவியினை மாதிரியாகக் கொண்டு மேற்கொண்டு ஆய்வாளர்கள் பிற கணினி மொழிகளிலும் பல்வேறு உத்திகளைப் பயன் படுத்தியும் தயாரிக்கலாம். ஆய்வாளர் இக் கருவியில் புறவய வினா அமைப்பில் வினாக்கள் அமைத்து விடை சொல்லத் தவறும் நிலையில் பாட விதிகளைப் படித்து பின் மீண்டும் வினாவிற்குப் பதிலளிக்கும் வண்ணமாய் வடிவமைத்து உள்ளார். இதன் பயனாக முழுமையாக ஒரு விதியினைக் கற்றுத்தேராமல் அடுத்த நிலைக்குச் செல்ல இயலாது.

மரபுமுறைக் குறைதீர் கற்றலில் உள்ள தடைகள்:

1. முன்னதாக, வகுப்பறையில் குழுக் கற்பித்தலில், மாணவர்களிடம் ஏற்பட்ட கற்றல் குறைபாடுகளைக் களைய மீண்டும் குழு கற்பித்தல் முறை சிறப்பாக உதவாது. குறைதீர் கற்றலுக்கு தனிப் பயிற்சி என்பதே சிறந்தது .

2. ஒவ்வொரு மாணவனும் தனித்துவமானவன் . வகுப்பில்,தனித்தனியே ஒவ்வொருவரையும் சந்தித்துத் தனிப்பயிற்சி அளிக்க ஒரு ஆசிரியரால் இயலாது.

3. வகுப்பில் அத்துணை மாணவர்களுக்கும் ஒரு ஆசிரியர் தனிப்பயிற்சி அளிக்க கால நேரம் போதாது.

4. மேலும் அனைத்து மாணவர்களும் ஒரே மாதிரிப் பிழைகளைச் செய்வதில்லை . ஆகவே, அவரவரின் பிழைகளுக்கு ஏற்ப குறைதீர் கற்றல் தேவைப்படுகிறது.

முன் கூறிய அனைத்துத் தடைகளையும் களைந்து கற்றலை மேம்பாடு அடைய இயலாமையே மரபுமுறைக் கற்றலின் மிகப்பெரும் குறைபாடு அல்லது தடைகள் ஆகும்.

கணினி வழிக் குறைதீர் கற்றலில் நன்மைகள் :

1. மாணவர்கள் அனைத்துப் பேருக்குமான குறைதீர் கற்றல் கருவி உருவாக்கினாலும் தனியொரு மாணவரின் தேவைக்கு ஏற்ப கற்றுக்கொள்ள முடியும்.

2. மாணவர் வகுப்பறைச் சூழல் தாண்டி தாமே குறைதீர் கற்றல் நிகழ்த்த கணினி வழிக் குறைதீர் கற்றல் கருவி பயன்படுகிறது.

3. ஒரே நேரத்தில் அனைத்து மாணவர்களும் தத்தமக்குரிய குறைதீர் கற்றலை நிகழ்த்திப் பிழைகளைக் களைய கணினி வழிக் குறைதீர் கற்றல் கருவி மிகவும் உதவுகிறது.

4. தனியொரு மாணவனின் கற்கும் திறனுக்கு ஏற்ப ஒருமுறையோ பலமுறையா மீண்டும் மீண்டும் தாமே கற்றுத் தேற கணினி வழிக் குறைதீர் கற்றல் கருவி துணை செய்கிறது.

5. முழுமையான நூறு சதம் கற்றறிதல் என்பதனை அடையும் வரை பல்வேறு பயிற்சிகள் மற்றும் மதிப்பீட்டு முறைகளைப் பயன்படுத்தி குறைதீர் கற்றலை நிகழ்த்த இயலும்

கணினி வழிக் குறைதீர் கற்றலில் தடைகள் :

1. போதுமான கணினிவழிக் குறைதீர் கற்றல் பாடப்பொருள் பயிற்சிக் கருவி இன்மை.

2. தமிழகச் சூழலில் ஆசிரியருக்கும் மாணவருக்கும் நுட்பவழிக் கற்றலில் பயிற்சியின்மை .

3. தமிழ் மொழிக்கல்வி குறித்தான உயர்மனப்பான்மை இன்மை . ஆகவே , முப்பத்தி ஐந்து சதவிகிதத் தேர்ச்சி போதுமென்ற மனப்பான்மை.

எதிர்காலத் தேவை:

1. கணினிவழிக் கற்றல் பாடப்பொருள் உருவாக்கும் பொழுதே அதனைச் சோதித்துப் பார்த்துக் குறைதீர் கற்றலை நிகழ்த்தத் தேவையான பாடப்பொருள் கருவிகளை உருவாக்குதல் வேண்டும்.

2. இதுவரை கற்றோரின் கற்றல் குறைகளைத் தீர்க்கத் தமிழக மெங்கிலும் தமிழ் மொழிப்பாடப் பிழை ஆய்வினைச் செய்து பிழைகளைக் குறைதீர்க் கற்றல் கருவிகளின் துணை கொண்டு களைய வேண்டும்.

3. தமிழ் மொழிப்பாடம் குறித்தான உயர் மனப்பான்மையைத் தமிழகப் பள்ளி கல்லூரிகளில் ஏற்படுத்த வேண்டும். அதற்கு அரசாங்கம் ஆறாம் வகுப்பு புகுவதற்கு முன் மாணவர்களுக்கு அடிப்படைத் தமிழ்மொழி இலக்கணக் கட்டமைப்பு அறிதலுக்கான தேர்வினை தமிழக அளவில் கட்டாயமாக்க வேண்டும் . அதில் குறையிருப்பின் அதனை நிவர்த்தி செய்துவிட்டு ஆறாம் வகுப்பில் நுழைவதை வலயுறுத்த வேண்டும்.

4. எட்டாம் வகுப்பு இறுதியில் தமிழ்மொழி வன்மையைச் சோதித்தலுக்கானத் தேர்வினை கட்டாயமாக்க வேண்டும். சான்றாக, எழுதுதல் திறனில் கடிதம், கட்டுரை, சுருக்கி வரைதல் இவை போன்ற புலமை சோதிக்கப்பட வேண்டும்.

5. எல்லாவற்றிக்குமாகக் கணினி வழியிலான கற்றல் பாடப் பொருளும் பயிற்சியும் சோதித்தல் கருவியும் தமிழ்மொழிப்பாடத்தில் உருவாக்க வேண்டியது உடனடித் தேவை. இதற்குத் தமிழ் வல்லுனர்கள் கல்வியியல் வல்லுனர்கள் மென்பொருள் தயாரிப்பாளர்கள் அனைவரும் இணைந்து பணியாற்ற வேண்டியது இக்காலத் தேவை.

கட்டுரை ஆக்கத்திற்குப் பயன்பட்ட நூல்கள்:

1. சங்கர், வே ., இயல் தமிழ் இலக்கணம் , நன்மொழிப் பதிப்பகம் , 41, கங்கை வீதி , வசந்த் நகர், புதுவை ,முதற்பதிப்பு, ஆகஸ்டு 2004.

2. சங்கர், வே ., மொழித்திறனும் மொழிப்பயிற்சியும் ,நன்மொழிப் பதிப்பகம்,41,கங்கை வீதி,வசந்த் நகர், புதுவை,முதற்பதிப்பு,டிசம்பர் ,2004.

3. Rekha Yadav Dr., EDUCATION TECHNOLOGY,University Science Press, 113, Golden House, Daryaganj,New Delhi, First Edition, 2011.

3. Subbaiah pon., Balakumar, M., ASSESSING MASTERY OF LANGUAGE, Central Institute of Indian Languages, Mysorre, India, Publication no. 505, First Publication, Feb. 2003.

4. Subbaiah pon.(Editor), Balakumar, M.(Assistance), TEST OF LANGUAGE PROFICIENCY for Secondary (std.X) level,Central Institute of Indian Languages, Mysorre, India, Publication no. 490, Second Publication, Jan. 2011

குறிப்பு: 

2012 உத்தமம் மாநாட்டு இதழில் வெளியான கட்டுரை.